ملتان (ایجوکیشن رپورٹر)گیلانی لاء کالج بہاء الدین زکریایونیورسٹی ملتان میں پیس اینڈ جسٹس نیٹ ورک کے زیراہتمام امن کے فروغ کے لیے یوتھ ڈویلپمنٹ پروگرام لانچ کرنے اور کلچرل ڈے کے افتتاحی سیمینار سے خطاب کرتے ہوئے وائس چانسلر پروفیسر ڈاکٹر منصور اکبر کنڈی نے کہا ہے کہ ہماری یونیورسٹی کا بنیادی مقصد اعلی تعلیم کے ساتھ ساتھ امن اور رواداری قائم کرنا بھی ہے۔ ہمیں اپنی درس گاہ میں ایسی فضا قائم کرنا ہوگی جس میں نوجوان اپنی صلاحیتوں کو بروئے کار لاسکے۔وائس چانسلر نے کہاکہ تمام مذاہب احترام انسانیت اور امن کی تعلیم دیتے ہیں ۔انہوں نے کہاکہ قانون کا بنیادی منشاء انصاف فراہم کرنا اور انصاف ایک طبقہ کے لیے نہیں ہوتا بلکہ پورے معاشرہ کے لیے ہوتا ہے ڈین فیکلٹی آف سائنسز پروفیسر ڈاکٹر طارق محمود انصاری نے خطاب کرتے ہوئے کہاکہ نوجوان ہمارے اچھے کل کی نوید ہیں ان کی صحیح تربیت کرنا ہمارا فرض ہے طلباء کے لیے پیس کلب بنانے کا یہ قدم اسی سلسلے کی ایک کڑی ہے پرنسپل گیلانی لاء کالج آصف صفدر کا کہنا تھا کہ پالیسیو ں کی تشکیل میںنوجوان کی شراکت نہایت اہم ہے۔ہمیں نوجوان نسل کو آگے لانا ہوگا۔ انہوں نے کہاکہ بہاء الدین زکریایونیورسٹی میں امن بیانیہ کو فروغ دینے اور معاشرتی ہم آہنگی اور ثقافتی ہم آہنگی کو فروغ دینے کے لیے مثبت سوچ ، قائدانہ صلاحیتوں اور امن سازی کو فروغ دینے کے پروگرام کا آغاز کردیاگیاہے۔چیف ایگزیکٹو ڈائریکٹر پیس اینڈ جسٹس نیٹ ورک رضا علی نے کہاکہ معیاری تعلیم کے ساتھ ساتھ نوجوانوں کو غیرنصابی سرگرمیوں میں بھی حصہ لینا چاہیے تاکہ ان میں فیصلہ سازی کی قوت فروغ پاسکے۔ کلچرل ڈے کے سلسلہ میں طلبہ نے پروگرام میں علاقائی رقص اور قومی ترانے بھی پیش کیے۔ پروگرام میں شریک اساتذہ اور طلبہ نے پیس کلب بنانے کے اقدام کو سراہا اور کہا کہ درس گاہوں میں طلبہ کی مناسب تربیت کے لیے یہ ایک اچھا قدم ہے۔پروگرام کے افتتاحی سیمینار میں مقررین نے امن اور ہم آہنگی کو برقرار رکھنے میں نوجوانوں کے کردار کو اجاگر کیا ۔ طلباء میں مثبت سوچ پیدا کرنے میں اساتذہ کے اہم کردار کے بارے میں بھی بات کی گئی ۔سیمینار میں ڈی ایس اے رئیس نعمان اور لاء کالج کے اساتذہ طلباء طالبات کی کثیر تعداد موجود تھی۔