اسلام آباد (این این آئی)وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہاہے کہ وزیراعلی جام کمال کے ساتھ بلوچستان میں جاری ترقیاتی منصوبوں پر تبادلہ خیال وزیراعظم عمران خان کے بلوچستان کی تعمیر، ترقی و خوشحالی کیلئے عزم کا واضح اظہار ہے۔ ٹوئٹر پراپنے بیان میں ڈاکٹر فردوس عاشق اعوان نے کہاکہ بلوچستان کے عوام کا احساس محرومی دور کریں گے، انہیں ملک کے دیگرترقی یافتہ علاقوں کے برابرلانا وزیراعظم عمران خان کا وژن ہے۔ ڈاکٹر فردوس عاشق اعوان نے کہاکہ بلوچستان کی ترقی پاکستان کی ترقی ہے۔ ڈاکٹر فردوس عاشق اعوان نے کہاکہ رقبے کے لحاظ سے سب سے بڑے صوبے کے عوام کا معیار زندگی بلند کرنا ترجیح ہے۔ ڈاکٹر فردوس عاشق اعوان نے کہا کہ ان کیلئے روزگار کے مواقع کی فراہمی اور صحت و تعلیمی سہولیات یقینی بنانا اپنا فرض سمجھتے ہیں۔ ڈاکٹر فردوس عاشق اعوان نے کہاکہ بلوچ عوام کی خوشحالی کیلئے تمام وسائل بروئے کار لائیں گے۔ انہوںنے کہاکہ وزیراعظم عمران خان عوامی ریلیف اور اکتہر سال سے درپیش مسائل کے حل کی مضبوط اور ٹھوس بنیاد رکھ چکے ہیں۔ ڈاکٹر فردوس عاشق اعوان نے کہاکہ مشکل فیصلوں کی اس سے پہلے کوئی حکومت ہمت نہیں کر سکی،مشکل فیصلے عمران خان کی ملک وقوم سے وابستگی کا ثبوت ہے۔ انہوںنے کہاکہ وزیراعظم عمران خان نے ماضی کے حکمرانوں کی طرح شو بازی کے بجائے قوم کو مصائب کی دلدل سے نکالنے کا فیصلہ کیا۔ ڈاکٹر فردوس عاشق اعوان نے کہاکہ وزیراعظم عمران خان کے جراتمندانہ اقدامات تبدیلی لائیں گے۔