اسلام آباد (این این آئی) اسپیکر قومی اسمبلی اسد قیصر نے کہاہے کہ پوری قوم مسئلہ کشمیر پر متفق ہے ،پاکستان کا بچہ بچہ کشمیر ی بھائیوں کے ساتھ کھڑا ہے۔ یوم یکجہتی کشمیر کے موقع پر اسپیکر قومی اسمبلی اسد قیصر نے کہاکہ پوری قوم مسئلہ کشمیر پر متفق ہے اور پاکستان کا بچہ بچہ کشمیر ی بھائیوں کے ساتھ کھڑا ہے۔ انہوںنے کہاکہ مسئلہ کشمیر صرف ایک علاقائی تنازعہ نہیں بلکہ یہ 80لاکھ  لوگوں کے خودارادیت کے مسئلہ ہے۔ انہوںنے کہاکہ بھارت لاک ڈاؤن اور منفی پروپیگنڈا سے کشمیر کی آزادی کی آواز کو نہیں دبایا جاسکتا۔اسد قیصر نے کہاکہ مسئلہ کشمیر  پر  پاکستان اپنے اصولی موقف سے ایک اینچ بھی پیچھے نہیں ہٹے گا۔ اسد قیصر نے کہاکہ بے گناہ کشمیریوں کے خلاف بھارتی حکومت کے جبر اور ظلم نے دنیا اور خطے کے امن کو داؤ پر لگا دیا ہے، بھارت کے  آئین سے آرٹیکل 370 اور 35 الف کو منسوخ کرنے سے کشمیری عوام کو ان کی شناخت اور آزادی سے محروم کردیا گیا ہے۔ اسپیکر قومی اسمبلی نے کہاکہ جو عالمی سطح پر کشمیریوں سے کیے گے وعدوں کی خلاف ورزی ہے، مذکورہ بالا آرٹیکل کی منسوخی بھارت حکومت کی نفرت انگیز  پالیسیوں کی عکاسی ہے۔ انہوںنے کہاکہ مقبوضہ کشمیر میں   184دنوں سے جاری طویل لاک ڈاؤن نے انسانی حقوق کی عالمی تنظیموں کے سب سے امتحان ہے۔ اسد قیصر نے کہاکہ کشمیر ی عوام کو بھارتی مسلح افواج نے اپنے گھروں میں قید کر رکھا ہے، مقبوضہ وادی کے عوام اشیائے خوردونوش، ادویات ، تعلیم ، انٹرنیٹ اور دیگر ضروریات زندگی سے محروم ہیں۔اسپیکر قومی اسمبلی نے کہاکہ پارلیمانی سفارتکاری کے ذریعے  تمام بین الاقوامی اور علاقائی فورموں پر کشمیریوں کا مقدمہ بھرپور انداز سے لڑ رہا ہے، کشمیری بھائیوں سے اظہار یکجہتی کے لئے قومی اسمبلی میں خصوصی بحث کا انعقاد کیا گیا، قومی اسمبلی میں کشمیری عوام کے حق خودارادیت کے حق میں متفقہ قرارداد منظور کی گئی ہے۔اسد قیصر نے کہاکہ پاکستان کی پارلیمنٹ نے ہمیشہ کشمیری عوام کے ساتھ کھڑی  رہی ہے، پارلیمنٹ نے تمام پارلیمانی فورموں پر مسئلہ کشمیر کو اجاگر کیا ہے۔اسپیکر قومی اسمبلی نے کہاکہ پاکستانی قوم اور میڈیا کو یوم یکجہتی کشمیر پر اپنے کشمیری بھائیوں سے اظہار یکجہتی کے لئے بڑھ چڑھ کر حصہ لینے کی ضرورت ہے۔ انہوںنے کہاکہ جنوبی ایشیاء کا مستقبل خطرے سے دو چار ہے جس کا ذمہ دار بھارت ہے، جنوبی ایشیاء میں سب سے بڑی جمہوریت کے دعوے بھارت نے کشمیری عوام کے خلاف ظلم و بربریت بازار گرم کر رکھا ہے۔اسپیکر اسد قیصر نے کہاکہ اقوام متحدہ اور عالمی برادری کو مسئلہ کشمیر کے بارے میں اپنی قراردادوں پر عمل درآمد کو یقینی کی ضروت ہے، پاکستان علاقائی و بین الاقوامی فورموں پر کشمیر ی عوام کی اخلاقی ، سفارتی اور سیاسی حمایت جاری رکھے گا۔ ڈپٹی اسپیکر قومی اسمبلی نے کہاکہ پاکستان مظلوم کشمیریوں کی آواز ہے اور ہر دکھ سوکھ میں  کشمیری بھائیوں کے ساتھ کھڑا رہے گا۔قاسم خان سوری نے کہاکہ پاکستان کی پارلیمنٹ مسئلہ کشمیر کے پرامن حل کے لئے پوری طرح پرعزم ہے، مقبوضہ کشمیر میں بھارتی مسلح افواج کے مظالم کے خلاف پاکستان کی موجودہ حکومت اپنی سفاری جنگ لڑتی رہے گی۔ قاسم خان سوری نے کہاکہ اقوام متحدہ کی قراردادوں کے مطابق مقبوضہ وادی کے لوگوں کے حق خود ارادیت کے لیے متعدد قراردادیں منظور کی ہیں، بھارت کا مقبوضہ کشمیر پر غاصبانہ قبضہ ریاست کے جدید اصولوں اور عوام کے خود ارادیت کے بنیادی حق کی نفی ہے۔