اسلام آباد(این این آئی)قومی اسمبلی اجلاس میں وفاقی وزیر عمر ایوب کی جانب سے آصف زرداری کو مسٹر 10 پرسنٹ کہنے پر ایوان میں شدید ہنگامہ آرائی ہو ئی،پیپلز پارٹی کے اراکین نے عمر ایوب کا گھیرائو کرتے ہوئے ایجنڈے کی کاپیاں پھاڑ دیں ،پی پی پی کے رکن اسمبلی آغا رفیع اور حکومتی ارکان گتھم گتھا ہوگئے ، سابق صدر ایوب خان کے خلاف بھی نعرے لگائے ، ڈپٹی اسپیکر کواجلاس ملتوی کر نا پڑا ۔ منگل کو قومی اسمبلی اجلاس کے دوران اظہار خیال کرتے ہوئے وفاقی وزیر توانائی عمر ایوب پاکستان پیپلز پارٹی اور مسلم لیگ (ن) پر برس پڑے اور کہاکہ 60 سے 70 کی دہائی میں مہنگائی ہوئی، مسلم لیگ (ن )30 ہزار ارب روپے تک قرضہ لے گئی ، پیپلزپارٹی کی سابقہ حکومت نے 15000 ہزار ارب روپے تک قرضہ چھوڑا۔اسی دوران وفاقی وزیر توانائی عمر ایوب نے سابق صدر اور شریک چیئرمین پاکستان پیپلزپارٹی آصف زرداری کو مسٹر 10 پرسنٹ کہا جس پر پیپلزپارٹی کی جانب سے احتجاج کیا گیا اور پارٹی ارکان نے عمر ایوب کی چیئر کا گھیراؤ کرکے حکومت کے خلاف نعرے بازی کی۔پیپلز پارٹی ارکان نے ایجنڈے کی کاپیاں بھی پھاڑدیں جبکہ رہنما پیپلزپارٹی آغا رفیع اللہ حکومتی ارکان سے گتھم گتھا ہوگئے اور سابق صدر ایوب خان کے خلاف نعرے لگائے، ا س موقع پر وزیر مملکت علی محمد خان معاملہ ٹھنڈا کرنے کی کوشش کی تاہم وہ بھی کامیاب نہ ہوسکے ،ہنگامہ آرائی کے بعد ڈپٹی اسپیکر نے اجلاس کی کارروائی 10 منٹ کے لیے معطل کی بعد ازاں اجلاس دوبارہ شروع ہوا تو علی محمد خان نے کہاکہ مہنگائی پر بحث جمعرات کے روز بھی جاری رہے گی۔علی محمد خان نے جمعرات کے روز معمول کی کاروائی معطل کرنے کی تحریک پیش کر دی،ایوان نے تحریک اکثریت رائے کی بنیاد پر منظور کر لیا۔ جے یو آئی کے سعد محمود نے کہاکہ ہم بھی اپوزیشن ہیں ہمیں نظر انداز کیا گیا تو ردعمل دیں گے ،ایوان کو کیسے چلانا ہے دیگر اپویشن جماعتوں کو بھی اعتماد میں لینا ہو گا ۔مہنگائی کے معاملے پر (آج) جمعرات کو ہم اپنا ردعمل دیں گے، بعد میں اجلاس (آج) جمعرات کی صبح 11 بجے تک کے لیے ملتوی کردیا گیا۔