کراچی (این این آئی)پاکستان کے سب سے بڑے کرکٹ میلے ایچ بی ایل پاکستان سپر لیگ کے سیزن 5 کی ٹرافی کی رونمائی کردی گئی۔ بدھ کو کراچی کے نیشنل اسٹیڈیم میں پی ایس ایل 2020 کی ٹرافی کی رونمائی کی تقریب منعقد کی گئی۔اس موقع پر ایچ بی ایل پی ایس ایل میں شامل ٹیموں کراچی کنگز، پشاور زلمی، کوئٹہ گلیڈی ایڈرز، اسلام آباد یونائیٹڈ اور لاہور قلندرز کے کپتان و مالکان اور چیئر مین پی سی بی بھی موجود تھے۔واضح رہے کہ لاہور قلندرز کے مالک فواد رانا اور ملتان سلطانز کے کپتان شان مسعود مصروفیات کی وجہ سے تقریب میں شریک نہ ہوسکے۔ایچ بی ایل پی ایس ایل 5 کی ٹرافی کو دفاعی چمپئن کوئٹہ گلیڈی ایٹرز کے کپتان سرفراز احمد، اسکواش لیجنڈ جہانگیر خان کے ہمراہ گراؤنڈ میں لے کر آئے، جس کے بعد ٹرافی سے پردہ اٹھایا گیا۔پاکستان کے سپر اسٹار اور اسکواش کے عظیم کھلاڑی جہانگیر خان نے چیئرمین پاکستان کرکٹ بورڈ احسان مانی و دیگر کے ہمراہ چمچماتی ٹرافی کی رونمائی کی۔واضح رہے کہ اس مرتبہ ایچ بی ایل پاکستان سپر لیگ کی ٹرافی برطانیہ کی کمپنی اوٹ ول سلور اسمٹس نے تیار کی ہے جس کے اوپر ایک چاند اور تکون ستارہ پاکستان کی نمائندگی کر رہا ہے۔ٹرافی کی لمبائی 65 سینٹی میٹر ہے اور اس کا کل وزن 8 کلو ہے جس میں مخصوص رنگ بھی نمایاں ہیں۔رواں سال متعارف کرائی جانے والی ٹرافی اب پاکستان سپر لیگ کے مستقبل کے تمام مقابلوں میں استعمال کی جائیگی اور ہر سال ایونٹ جیتنے والی ٹیم کا نام اس ٹرافی پر درج کیا جائے گا۔خیال رہے کہ پاکستان سپرلیگ کا آغاز (آج) جمعرات سے کراچی میں ہورہا ہے اور اس مرتبہ ایونٹ کے تمام میچ پاکستان میں ہی کھیلے جائیں گے، میچ سے قبل رنگا رنگ افتتاحی تقریب بھی منعقد کی جائیگی۔